ក្រសួងបរិស្ថាន៖ ទឹកសម្អុយហូរចូលសមុទ្រ ព្រោះតែគំហុកការអភិវឌ្ឍសេដ្ឋកិច្ចក្នុងតំបន់
នៅមួយរយៈចុងក្រោយនេះ កំពង់សោម តែងតែត្រូវមហាជនរិះគន់ជាច្រើនករណីមានទាំងកំណើនបទល្មើសរបស់ជនជាតិចិន ការប្រើប្រាស់ភាសាចិនតាមហាង តម្លៃទំនិញម្ហូបអាហារ ផ្ទះសំណាក់ សណ្ឋាគារឡើងថ្លៃ កាកសំណល់សំរាម និងទឹកសម្អុយហូរចូលសមុទ្រជាដើម។
ថ្មីៗនេះ មហាជនបានឃើញទឹកសម្អុយខ្មៅកខ្វក់ត្រូវបានគេបង្ហូរចូលទឹកសមុទ្រច្រើនឡើងៗធ្វើឲ្យពួកគាត់កើតក្ដីបារម្ភពីការប៉ះពាល់ធនធានសមុទ្រ បរិស្ថាន និងទេសចរណ៍។ បញ្ហាបរិស្ថានក្នុងខេត្តព្រះសីហនុ ដែលរងការរិះគន់កន្លងមក គឺជាគំរូអវិជ្ជមានមួយសម្រាប់ជាមេរៀនដល់ការអភិវឌ្ឍន៍នៅខេត្តផ្សេងៗទៀត។
តំបន់ឆ្នេរដ៏ល្បីរបស់កម្ពុជាមួយនេះ បានរងការបំផ្លាញបរិស្ថានពីការទុកដាក់សំរាមមិនបានល្អ ការរំខានដល់សមុទ្រដោយការបង្ហូរទឹកសម្អុយ កម្ទេចដីពីការរដ្ឋានសំណង់ ការលុបឆ្នេរ ជាដើម។ ឯកឧត្តម នេត្រ ភក្ត្រា ជារដ្ឋលេខាធិការ និងជាអ្នកនាំពាក្យក្រសួងបរិស្ថាន បានផ្ដល់បទសម្ភាសជាមួយគេហទំព័រព័ត៌មានថ្មីៗកាលពីថ្ងៃម្សិលមិញថា បញ្ហានេះកើតឡើងក៏ព្រោះតែគំហុកនៃការអភិវឌ្ឍន៍សេដ្ឋកិច្ចនៅតំបន់នោះ ខណៈដែលរដ្ឋាភិបាលមិនទាន់រៀបចំបានរួចរាល់។
លោកបានអះអាងបន្ថែមថា បញ្ហាបរិស្ថាននៅខេត្តព្រះសីហនុ ពិសេសការបង្ហូរសំណល់ចូលសមុទ្រ នឹងត្រូវបានដោះស្រាយនាពេលខាងមុខ ព្រោះរដ្ឋាភិបាលកំពុងរៀបចំហេដ្ឋារចនាសម្ព័ន្ធ អាងប្រព្រឹត្តកម្មទឹកកខ្វក់ និងគ្រប់គ្រងអាជីវកម្ម សំណង់ យ៉ាងយកចិត្តទុកដាក់៕ (អត្ថបទ៖ ជាតិបុត្រ)
0.000 SRY