អគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច.)
នៅថ្ងៃទី១០ ខែមករា ឆ្នាំ២០១៩ ឯកឧត្ដម ទិន ពន្លក អគ្គលេខាធិការនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច.) លោក Nick Beresford តំណាងប្រចាំប្រទេសរបស់កម្មវិធីអភិវឌ្ឍន៍សហប្រជាជាតិ បានអញ្ជើញជាអធិបតីបើកសិក្ខាសាលាផ្តល់សុពលភាពឯកសារគម្រោងស្ដីពី “ការបញ្ជ្រាបការគ្រប់គ្រងធនធានធម្មជាតិទៅក្នុងផលិតភាពធម្មជាតិ និងព្រៃទេសភាព នៅតំបន់ភាគខាងជើងនៃប្រទេសកម្ពុជា (INRM)” ។
ក្នុងឱកាសនោះ ឯកឧត្ដម ទិន ពន្លក អគ្គលេខាធិការ ក.ជ.អ.ច. បានមានប្រសាសន៍លើកឡើងពីភាពសម្បូរបែប និងសារសំខាន់មិនអាចខ្វះបាននៃសេវាកម្មប្រព័ន្ធអេកូឡូស៊ីព្រៃឈើ នៅក្នុងតំបន់ភាគខាងជើងនៃប្រទេសកម្ពុជា ដែលជាទីជម្រកដ៏សំខាន់នៃប្រភេទសត្វ និងរុក្ខជាតិ ជាទីតាំងរក្សាទុកធនធានពន្ធុសម្រាប់អភិរក្សជីវៈចម្រុះ ជាប្រភពនៃស្បៀងអាហារ ទប់ស្កាត់ការប្រែប្រួលអាកាសធាតុ និងជាតំបន់ទេសចរណ៍ធម្មជាតិ។ល។
ឯកឧត្ដមអគ្គលេខាធិការ ក.ជ.អ.ច. បន្តទៀតថា៖ គម្រោងសាកល្បងនេះមានចំណងពាក់ព័ន្ធដោយផ្ទាល់ដល់ការអនុវត្តយុទ្ធសាស្ត្រចតុកោណរបស់រាជរដ្ឋាភិបាល ដែលនឹងរួមចំណែកលើកកំពល់ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋ ហើយលទ្ធផលដែលទទួលបានពីការសិក្សាស្រាវជ្រាវ និងការអនុវត្តគម្រោងនឹងក្លាយជាធាតុចូលសម្រាប់ការរៀបចំគោលនយោបាយ ផែនការយុទ្ធសាស្ត្រ និងលើកជាជម្រើសសមស្របសម្រាប់ការធ្វើសេចក្ដីសម្រេចចិត្តនានាក្នុងកិច្ចការពារ និងអភិរក្សធនធានជីវៈចម្រុះផងដែរ។ ហើយ គម្រោងការគ្រប់គ្រងធនធានធម្មជាតិនៅក្នុងតំបន់ទេសភាពនៃព្រៃធម្មជាតិ និងផលិតភាពធម្មជាតិនៅតំបន់ភាគខាងជើងនៃប្រទេសកម្ពុជា (INRM) នឹងអនុវត្តនៅដែនជម្រកសត្វព្រៃគូលែនព្រហ្មទេព តំបន់ការពារទេសភាពអង្គរ និងឧទ្យានជាតិព្រះជ័យវរ្ម័ន-នរោត្តម ភ្នំគូលែន មានគោលបំណងលើកកម្ពស់ការគ្រប់គ្រងតំបន់ទេសភាពរួមគ្នាសម្រាប់ការអភិរក្សនិងប្រើប្រាស់ដោយចីរភាពនូវធនធានជីវៈចម្រុះនិងសេវាកម្មប្រព័ន្ធអេកូឡូស៊ី។ ប្រជាពលរដ្ឋប្រមាណ១.៣លាននាក់ ដែលរស់នៅតំបន់ភាគខាងជើង នឹងទទួលបានផលប្រយោជន៍ដោយផ្ទាល់ និងប្រយោលពីការអនុវត្តគម្រោងនេះ។
គួសបញ្ជាក់ថា៖សិក្ខាសាលានេះគាំទ្រដោយកម្មវិធីអភិវឌ្ឍន៍សហប្រជាជាតិ (UNDP) និងមានការចូលរួមពីតំណាងអគ្គនាយកដ្ឋាន នៃក្រសួងបរិស្ថាន តំណាងក្រសួង ស្ថាប័ន និងអង្គការពាក់ព័ន្ធចូលរួមសរុបប្រមាណ១០០រូប ក្នុងគោលបំណងដើម្បី៖ ១) បង្ហាញពីវឌ្ឍនភាពឯកសារគម្រោង INRM ដែលបានកែសម្រួលផ្អែកលើអនុសាសន៍ និងធាតុចូលដែលទទួលបានពីសិក្ខាសាលាបើកដំណើរការគម្រោង និង
២) ពិនិត្យ ពិភាក្សា និងផ្ទៀងផ្ទាត់លើទិន្នន័យ និងព័ត៌មាន ដែលប្រមូលបាន។
ដោយ ក្រសួងបរិស្ថាន
0.000 SRY