លក្ខណៈទង់ជាតិសព្វថ្ងៃចំពោះអត្ថន័យ អ្នកយល់ម្តេចដែរ​ ?

 តើការប្រើប្រាស់ទង់ជាតិកម្ពុជាសព្វថ្ងៃ មានលក្ខណៈត្រឹមត្រូវដែរឬទេ?  ទង់ជាតិ នៃព្រះរាជាណាចក្រកម្ពុជា មាន៣ពណ៌ គឺផ្នែកខាងលើ និងខាងក្រោមពណ៌ខៀវ ផ្នែកកណ្តាលពណ៌ក្រហម មានរូបប្រាសាទពណ៌សនៅកណ្តាល។ - ពណ៌ខៀវតំណាងសាមគ្គីភាព ភាតរភាព មេត្តាករុណា សន្តិភាព អហឹង្សា ស្ថិតនៅក្រោមព្រះរាជកិច្ចដឹកនាំរបស់ ព្រះមហាក្សត្រតំណាងឲ្យ ភាពត្រជាក់ត្រជុំនៃធម្មជាតិស្រស់បំព្រង។ - ពណ៌ក្រហមតំណាងឲ្យស្មារតីអង់អាច ក្លាហាន ពុះពារ គ្រប់ឧបសគ្គ ពលីកម្មសព្វបែបយ៉ាងដើម្បីទឹកដី។ - រូបប្រាសាទអង្គរពណ៌ស តំណាងអរិយធម៌ខ្មែរដ៏រុងរឿង នាសម័យមហានគរ និងតំណាងសាសនា សីលធម៌ ចរិយាធម៌។ តាមការពន្យល់អំពីទង់ជាតិរបស់ប្រទេសដែលជាសមាជិកនៃប្រទេសអាស៊ាន បានពន្យល់ពីអត្ថន័យ នៃទង់ជាតិប្រទេសកម្ពុជាថា៖ - ទង់ជាតិ​ប្រទេស​កម្ពុជា ផ្ទៃ​ទង់​ចែកចេញជា​៣​ឆ្នូត ដោយ​ឆ្នូត​កណ្ដាល​ពណ៌​ក្រហម​តំណាង​ឲ្យ​ជាតិ ​និង​មាន​រូប​ប្រាសាទ​អង្គ​វត្ត​ពណ៌​ស​នៅ​ចំ​កណ្ដាល​តំណាង​ឲ្យ​សន្ដិភាព​ និង​សាសនា ឯ​ផ្ទៃ​ពណ៌​ខៀវ​ដែល​នៅ​នៅ​ផ្នែក​ខាងលើ​និង​ខាងក្រោម​នៃ​ទង់​តំណាង​ឲ្យ​ស្ថាប័ន​ព្រះមហាក្សត្រ។ ការកត់សម្គាល់របស់ខ្ញុំស្ដីអំពីទង់ជាតិកម្ពុជា៖ ប្រទេសកម្ពុជា ក្នុងសម័យសង្គមរាស្ត្រនិយម ដឹកនាំដោយសម្ដេចតា សម្ដេចព្រះនរោត្តម សីហនុ បានដឹកនាំប្រទេសកម្ពុជាមានការរីកចម្រើនយ៉ាងខ្លាំង មានភាពល្បីល្បាញលើសាកលលោក និងបាននាំប្រទេសកម្ពុជា ចូលជាសមាជិកនៃអង្គការសហប្រជាជាតិ។ កម្ពុជាបានតម្កល់ឯកសារយ៉ាងច្រើន ក្នុងនោះមានផែនទីប្រទេសកម្ពុជា ... ហើយក៏មានអត្តសញ្ញាណនៃទង់ជាតិកម្ពុជាផងដែរ។ ប្រទេសនានាជុំវិញ ពិភពលោក បានទទួលស្គាល់អត្តសញ្ញាណទង់ជាតិកម្ពុជាយើងជាផ្លូវការ ស្របតាមការតម្កល់ទង់ជាតិប្រទេសកម្ពុជា ក្នុងនាមជាសមាជិកអង្គការសហប្រជាជាតិ។  ទង់ជាតិដែលបានតម្កល់ទុកនៅអង្គការសហប្រជាជាតិ ត្រូវបានយកមក ប្រើប្រាស់ជាផ្លូវការវិញ បន្ទាប់ពីកម្ពុជារៀបចំរដ្ឋធម្មនុញ្ញថ្មី នៅឆ្នាំ១៩៩៣ ហើយបន្តប្រើរហូតមកដល់សព្វថ្ងៃ។  នៅក្នុងការពន្យល់អត្ថន័យនៃទង់ជាតិកម្ពុជា គឺមានតែ៣ពណ៌ប៉ុណ្ណោះ គឺពណ៌ខៀវ ពណ៌ក្រហម និងពណ៌ស ហើយគ្មានពណ៌ខ្មៅទេ។ តែបើមានឆ្នូតពណ៌ខ្មៅលើប្រាសាទអង្គរវត្តពណ៌សនោះមែន តើពណ៌ខ្មៅនោះ មានអត្ថន័យយ៉ាងដូចម្ដេច? សូមមេត្តាជួយបកស្រាយផង។ យោងតាមការពន្យល់អំពីពណ៌នៃទង់ជាតិកម្ពុជា ខ្ញុំអាចបញ្ជាក់បានថា៖ ទង់ជាតិកម្ពុជាកំពុងប្រើសព្វថ្ងៃ ដែលមានឆ្នូតពណ៌ខ្មៅលើរូបប្រាសាទ អង្គរវត្តពណ៌សនោះ (មាន២ទម្រង់ គឺឆ្នូតពណ៌ខ្មៅមានកាំជណ្ដើរ និងឆ្នូតពណ៌ខ្មៅ គ្មានកាំជណ្ដើរ) គឺជាទង់ជាតិដែលមិនស្របតាមការពន្យល់ អំពីអត្តសញ្ញាណ ពណ៌នៃទង់ជាតិកម្ពុជាយើង។  ទង់ជាតិដែលស្របតាមការពន្យល់ពីអត្ថន័យនៃទង់ជាតិកម្ពុជា គឺជាទង់ជាតិដែលមានឆ្នូតពណ៌ក្រហមលើរូបប្រសាទអង្គរវត្ត ហើយគ្មានកាំជណ្ដើរនោះទេ។ សូមពិនិត្យមើលប្រទេសចិន ប្រទេសជប៉ុន និងប្រទេសផ្សេងៗទៀត គឺប្រើទង់ជាតិកម្ពុជា មានឆ្នូតពណ៌ក្រហម គ្មានកាំជណ្ដើរ ដែលកម្ពុជាបានតម្កល់ទុកនៅអង្គការសហប្រជាជាតិ។ ឆ្លៀតក្នុងឱកាសនេះ ខ្ញុំព្រះករុណាខ្ញុំបាទ ស្នើសុំឱ្យស្ថាប័ននីតិបញ្ញត្តិទាំង ២កម្រិត, ក្រុមប្រឹក្សាធម្មនុញ្ញ និងរាជរដ្ឋាភិបាលនៃព្រះរាជាណាចក្រកម្ពុជា សូមមេត្តាពិនិត្យលើការប្រើប្រាស់ទង់ជាតិកម្ពុជាយើងឡើងវិញ និងសូមកំណត់ឱ្យមានស្តង់ដារួមតែមួយបានហើយ ដើម្បីកុំឱ្យមាន ការយល់ច្រឡំតទៅទៀត។ តើមួយណាជាទង់ជាតិកម្ពុជាពិតប្រាកដ? ហើយបើប្រើទម្រង់ណាមួយ សូមមេត្តាជូនដំណឹងទៅប្រជាជាតិខ្មែរ អង្គការសហប្រជាជាតិ និងប្រទេសជាមិត្តកម្ពុជា លើសាកលលោក បានដឹងឮអំពីការផ្លាស់ប្ដូរនេះផងដែរ។ បើខ្មែរមិនទាន់ឯកភាពគ្នាជាធ្លុងមួយ នៅក្នុងការប្រើប្រាស់ទង់ជាតិកម្ពុជា ដែលជាអត្តសញ្ញាណរបស់ប្រទេសខ្លួនផង តើកម្ពុជា និងអ្នកនយោបាយ ខ្មែរគ្រប់និន្នាការអាចបង្កើតឯកភាពជាតិខ្មែរតែមួយបានយ៉ាងដូចម្ដេច? សូមមេត្តាគិតគូរឡើងវិញទាំងអស់គ្នា! ហើយខ្ញុំសូមអរគុណដល់បងប្អូន និងមិត្តភ័ក្រក្នុងបណ្ដាញសង្គមសេរីទាំងអស់ ដែលបានចំណាយពេលអាន រហូតដល់ចប់។   ~ @pov